Karolus etc. Fratri Gaufrido, Ordinis Militie Templi Magistro, Guillelmo de Villeriis, clerico, et Odoni de Fontaynes, militi. De statu situ munitione ac valore arcium et castrorum nostrorum de Aprutio ... certificari volentes, prudentie vestre ... mandamus quatenus ad singulas arces singulaque castra nostra predicte provincie vos personaliter conferentes ... diligentius inquiratis, et ea qua inveneritis, in scriptis redacta, fideliter sub sigillis vestris ad nostram Curiam transmictatis ... Articuli sunt hii: Primum inquirantur et redigantur in scriptis omnes arces cunctaque castra, tam illa videlicet que fuerunt de antiquo demanio, quam etiam illa que sunt de novo, et alias ad Curiam per excadentiam devoluta. Item inquiratur de situ singulorum, et que sunt illa que sita sunt super aliquibus bonis passibus. Item que sunt illa que possunt afferre profectum tempore guerre, et quem profectum possunt afferre. Item que et quot sunt illa que oportet necessario custodire et muniri. Item quot servientes sufficiant ad munimen et custodiam singulorum. Item inquiratur et provideatur de castris et arcibus que sunt inutilia et possunt dirui sine prejudicio Curie. Itam si sunt aliqua de quibus dominus Rex possit facere gratiam aliquibus fidelibus suis, de valore annuo singulorum, et utrum arces seu castra huiusmodi tantum valeant quod hii quibus illa concedi contingat possent de illorum proventibus expensas faciendas in ipsorum custodia sustinere.
Datum Capue, XXVII februarii, X ind. ut supra.
