Pergamene Potenza - Fondo Fusco

Nos Antonius de Lauro de Athena de Potencia annalis iudex civitatis ipsius, Franciscus notarii Iacobi de eadem civitate Potencie puplicus ubilibet per totum regnum Sicilie reginali auctoritate notarius et testes subscripti ad hoc specialiter vocati et rogati presenti scripto puplico fatemur atque testamur quod in nostri presencia constitutus Donatus de Caffardo de Potencia non vi, non dolo, non metu ductus, ut dixit, nec aliquibus suasionibus circumventus, sed sua bona, libera et gratuita voluntate, sicud sibi utile et expediens visum fuit, vendidit, alienavit et per fustis traddicionem assignavit, iure proprio et imperpetuum, dompno Antonio de Tito de eadem civitate Potencie, ibidem presenti, pro se et suis heredibus recipienti et ementi, domum unam sitam in dicta civitate Potencie in parrochia Sancti Michaelis, iuxta domum dicti dompni Antonii emptoris, mediante muro comuni, ab una parte, ab alia parte iuxta domum dicte ecclesie Sancti Michaelis, mediante muro comuni, ab alia parte iuxta quandam quintanam vicinalem et ab alia parte iuxta rugam puplicam et siqui alii sunt confines. Et dictus venditor prefatum emptorem in corporalem possessionem dicte domus coram nobis per fustem induxit ad verum dominium et proprietatem ipsius emptoris et heredum suorum ad habendum, tenendum, possidendum, vendendum, donandum, permutandum, nec non et quocumque modo voluerint dictus emptor et sui heredes alienandum, cum viis suis in dicta domo intrandi et exeundi atque cum omnibus aliis iuribus et pertinentiis suis sibi pertinentibus quovis modo. Pro qua venditione dictus venditor coram nobis confexus et contentus fuit se habuisse et manualiter recepisse a dicto emptore nomine precii in carlenis argenti sexaginta per unciam et duobus pro tareno quolibet computatis, uncias duas et tarenos sex, ponderis generalis, totum silicet precium venditionis ipsius. Promictens dictus venditor per se suosque heredes dicto emptori pro se et suis heredibus stipulanti litem, controversiam vel questionem aliquam de dicta domo ullo umquam tempore non inferre, nec inferenti consentire vel assentire, sed dictam domum eidem emptori et suis heredibus ab omni homine et persona quacumque legitime defendere, guarentire et disbrigare et de evictione teneri et dictam vendicionem et omnia et singula supradicta et infrascripta firmam et firma ac ratam et rata habere et tenere et numquam contrafacere vel venire per se et suos heredes, aud aliquos quovis modo, in iudicio vel extra iudicium, de iure vel de facto, aliqua occasione, modo, ingenio seu tractatu, sub pena dupli precii supradicti, medietate ipsius pene curie regie vel alteri curie ubi exinde facta fuerit reclamatio seu querela, et altera medietate dicto emptori vel suis heredibus persolvenda totiens quotiens fuerit exinde quomodolibet contrafactum, me predicto notario tamquam persona puplica pro parte dicte curie et dicto emptore a prefato venditore penam ipsam sollemniter stipulante, qua commissa vel non commissa, exacta vel non exacta seu gratiose remissa presens nichilominus instrumentum cum omnibus que in se continet in suo semper robore et efficacia perseveret, cum refectione dampnorum, interesse et expensarum litis et extra litem que fierent propterea quoquomodo, de quibus stari et credi debeat assertioni cum iuramento dicti emptoris et eius heredum, nulla alia probatione quesita. Et renunciavit super hiis dictus venditor voluntarie et expresse pro cautela dicti emptoris et heredum suorum exceptioni doli mali, vix, metus et in factum, presentis non sic celebrati contractus, exceptioni deceptionis et fraudis reique predicto modo non geste vel aliter habite quam superius continetur et est expressum, exceptioni dicte non numerate pecunie, non solute, non habite et non recepte ac non boni argenti, legi ressissorie qua deceptis ultra dimidiam iusti precii subvenitur, et generaliter omnibus aliis ausiliis et beneficiis omnium iurium atque legum, et specialiter iuri dicenti generalem renunciationem non valere et iuri per quod cavetur quod dicto iuri renunciari non possit, quibus et propter que dicte venditio et confexio et scripti huius tenor possent in aliquo minui vel infringi. Pro quibus omnibus et singulis actendendis et inviolabiliter observandis quodque predicta omnia et singula vera sunt, dictus venditor prefato emptori presenti et recipienti coram nobis corporaliter tacta prestitit ad sancta Dei evangelia iuramentum. Preterea Magnella, mater dicti Donati venditoris, uxor condam magistri Antonii Caffardi, patris Donati ipsius, de eadem civitate Potencie, mero iure romano vivens, sicut ceteri homines et mulieres ipsius civitatis Potenciee ab antiquo vixerunt et vivunt, dicte venditionis dicte domus per eundem Donatum facte, sicut predicitur, dicto emptori sua spontanea voluntate, ut dixit, consensit eamque ratificavit et acceptavit. Et renunciavit omnibus iuribus et actionibus quibuscumque que sibi forte competerent et posset in futurum competere in et super dicta domo vendita, tam ratione dotium suarum quam dodarii et omnium aliorum iurium quorumcumque, et de ipsa venditione firma et rata habenda et contra ipsam non veniendo quoquomodo. Et proinde obligavit se ad penam predictam solvendam et stipulatam ut supra et dicto emptori proinde corporaliter tacta iuravit, et voluerunt ipsi contrahentes quod si aliqua iuris sollempnitas in presenti instrumento deficeret tacite et expresse intelligatur in eo et totiens refici possit et emendari ad consilium sapientis quotiens opus erit veritatis tamen substantia non mutata. Unde ad futuram memoriam et dicti Donati venditoris ac Magnelle consencietricis preces et prefati dompni Antonii emptoris et heredum suorum cautelam factum est exinde presens puplicum instrumentum per manus mei predicti notarii signo meo solito signatum, mei qui supra iudicis ac nostrum predictorum subscriptorum testium subscriptionibus roboratum.