Pergamene Potenza - Fondo Fusco

Scire vos volumus quod die quinto mensis marcii, secunde indictionis, apud civitatem Potencie, dum curiam regeremus in hospitio iudicis Meuli de Sacco de Potencia, posito in dicta civitate Potencie, videlicet in parrochia Sancti Girardi, suis finibus limitato, una cum iudice Antonio Bernalla de Campanea, iudice et assessore nostro, presente quoque ibidem notario Nicolao Cocio de Neapoli actorum notario per reginalem curiam, nobis datis omnibus conquerentibus, ad quos spectat officium iusticiam ministrando, comparuerunt ibidem venerabiles viri dopnus Nicolaus Martinus et dopnus Nicolaus de Sturno, clerici et procuratores electi ecclesie Sancti Michaelis de Potencia, et quandam obtulerunt petitionem tenoris et continencie subsequentis: «Coram vobis magnifico viro Antonello Pulderico, domini reginalis iusticiarii reginalium terrarum provincie Basilicate locumtenente, et vestra curia exponunt humiliter venerabiles viri dopnus Nicolaus Martinus et dopnus Nicolaus de Sturno, clerici et procuratores electi ecclesie Sancti Michaelis de Potencia, dicentes quod cum in questione olim habita inter tunc procuratores dicte ecclesie ex una parte, et notarium Nicolaum Cortesium de Potencia ex parte altera, de quibusdam terris et aquarum fontibus et decursibus dicte ecclesie, positis et contentis in tenimento Potencie in loco ubi dicitur Draconara, suis finibus designatis, et de questione seu causa ipsa per curiam Philippi Antonii, predecessoris vestri, pro dicta ecclesia seu tunc procuratoribus ipsius ecclesie fuerit sententia promulgata, succubente dicto notario Nicolao convento et per ipsum notarium Nicolaum post dictam latam sententiam fuit ad Sacram Reginalem Maiestatem seu ad eius Sacrum Consilium appellatam, et visa sententia cum appellis et processu in eadem reginali curia per iudicem Nardum de Nola appellationum et nullitatum per dictam reginalem curiam deputatum, provisum fuit et decretum in causa predicta fuisse bene et iuritice sententiatum et male exinde appellatum de causa predicta ecclesia ipsa seu procuratores ipsius, succubente dicto notario Nicolao convento, ut patet per instrumentum et sententiam scriptam in carta pergamene exinde roboratum, quod instrumentum seu quam sententiam procuratores ipsi ad eorum seu dicte ecclesie cautelam et vestre curie certitudinem presentialiter representant et cetera». Qua petitione per nos et nostram curiam admissa, dictum instrumentum seu dictam sententiam, sicut predicitur, presentatum et presentatam, recepimus, tenoris et continencie subsequentis: ... Nos vero actendentes quod officii nostri necessitas compellit ut iusta petentibus non denegetur assensus quia nil prodest sententiam fieri nisi debita executio sequeretur propterea vobis Nicolao et Donato, quo supra, vel eorum alteri mandamus expresse quatenus visis presentibus vos personaliter conferatis ad dictum locum Dragonarie de territorio et pertinentiis dicte civitatis Potencie, ubi dicta terra et aquarum fontes et decursus situate sunt, et asseruntur esse et adhibitis tecum iudice, notario et testibus in numero oportuno in possessionem, proprietatem et dominium dicte terre seu dictarum terrarum, unde et ex quibus oriuntur et transeunt dicte fontes et aque defluunt unde irrigantur diverorsum beneficia atque lini, scitarum et positarum in dicto territorio dicte civitatis Potencie in loco ubi dicitur le Dragonare, iuxta possessionem notarii Nicolai Cortesii que fuerunt condam Andreucii de Lacupensuli, videlicet a parte septentrionis, iuxta quandam terram seu novale que est arata et prope lacum, que terra est ipsius notarii Nicolai et vaddunt per angulum usque ad quendam lapidem, qui est in costa montis super ubi fontes oriuntur qui vulgariter appellatur lo Montecello et cetera, prout superius annotantur, dictos dopnum Nicolaum Martinum et dopnum Nicolaum de Sturno procuratores, ut supra, dicte ecclesie Potencie seu alium vel alios sui parte inducatis ipsosque inductos, procuratorio nomine quo supra, manuteneatis et defendatis ad tenendum, possidendum, utifruendum per ipsam ecclesiam seu per procuratorem seu procuratores ipsius vel per aliquem sui parte tamquam dominam et patronam seu dominos et patronos pro parte ecclesie prelibate de eisdem disponendum tantum de bonis aliis propriis ipsius ecclesie et si in possessionem dicte terre seu dictarum terrarum ex quibus oriuntur et transeunt dicti fontes inveniretis ac alter ipsorum invenerit aliquem detentorem, conductorem, inquilinum seu colonum ipsum debeas a poxessione predicta omni modo expellere et ipsis procuratoribus dicte ecclesie seu alicui pro parte sua vacuam poxessionem, ut supra, debeas assignare eidem inquilino seu colono, conductori seu detentori ex reginali nostraque parte ad penam unciarum quinquaginta nostre curie appellandam in personam, siqui executioni resistere vellet, quam penam similiter simili modo et forma imponas notario Nicolao Cortesio predicto et quia in predicta diffinitiva sententia dictus notarius Nicolaus Cortesius seu eius procurator ad expensans extitit condemnatus factas in causa predicta tam in principali quam in causa appellationis atque in presenti comissione per prefatos procuratores ipsius ecclesie quas una cum dicto iudice et assessore nostro et in presentia dicti actorum notarii in uncia una et tarenis quindecim in carlenis argenti taxavimus, sacramento procuratorum dicte ecclesie secuto, ut iuris et moris est. Igitur alia bona dicti notarii Nicolai perquiratis seu perquiras in dicta civitate Potencie sistencia vel alibi et dictos procuratores dicte ecclesie Sancti Michaelis in possessionem corporalem inducas dictorum bonorum incipiendo a bonis mobilibus et in defectu mobilium ipsos in possessionem bonorum immobilium inducas tantorum bonorum predictorum quod assendant ad summam seu valorem dicte uncie unius et tarenorum quindecim extimandorum per duos vel tres probos viros dicte civitatis Potencie per te in premissis eligendos possidendorum et tenendorum per ipsam ecclesiam seu procuratores ipsius tamquam dominam et patronam si per anni circulum non fuerit ab eodem notario Nicolao de predictis uncia una et tarenis quindecim integraliter satisfactum, ipsos procuratores dicte ecclesie sic inductos, manuteneas et defendas per penarum impositionem et executiones per te faciendas, ut supra, dicto notario Nicolao seu aliis dictam ecclesiam seu dictos procuratores ipsius turbantibus seu molestantibus in possessione predicta facturus fieri de executione huiusmodi tria puplica et consimilia instrumenta, quorum unum penes te retineas, aliud dictis procuratoribus dicte ecclesie assignari facias pro eorum cautela, reliquum vero nobis et nostre curie quantocius poteris studeas presentare pro cautela dicte curie et memoria futurorum. In cuius rei testimonium presentes vobis vel alteri vestrum fieri fecimus nostro sigillo ac niciis dicti nostri iudicis et assessoris et dicti actorum notarii communitas.