Petrus de Vinea, Epistolarum libri VI

date

1246

author

Petrus de Vinea

title

Ep. III 17 (Mirati satis et moti quodammodo fuimus...)

summary

Federico II afferma di non sapere da dove provengano le voci che hanno offeso e turbato il suo corrispondente, il capitano del regno di Sicilia, tuttavia si dichiara felice del fatto che esse non abbiano compromesso la sua lealtà. Il sovrano gli conferma quindi la sua stima, invitandolo a dissipare dubbi e rancori che riguardino la sua fiducia verso di lui.

bibliography

  • L'epistolario di Pier della Vigna, coord. di E. D'Angelo, ed. crit. a cura di A. Boccia, E. D’Angelo, T. De Angelis, F. Delle Donne, R. Gamberini, Soveria Mannelli 2014, p. 506
  • Par. lat. 8563, f. 49v, M, Pa, Pr, V

teibody

Capitaneo regni Syciliae, ut firmus existat in fide, abiciendo omnem rancorem, si aliqua friuola fuerunt relata.

1. Mirati satis et moti quodammodo fuimus, unde potuerunt uerba illa deformia, conscientiam tuam lesura, procedere, et tuae mentis stabilis sic subito turbare quietem. 2. Sed gauisi multo magis fuimus, quod fidei tuae probata sinceritas ad uerba tam friuola flecti non potuit; sed quo magis huiusmodi uerba sentis inania, eo plus in nostris seruitiis tua firma stat et fixa constantia, quam fidelitas incorrupta coadiuuat, et pro qua laudabilium operum experimenta perorant et constantiae nostrae puritas, testis uidelicet extraneo quolibet delatore sollempnior, interpellat. 3. Nam, quae posset aut deberet dici de nobis, aut inesse tibi, dubietas, cum, preter affectionis occultae presagia, quae uideri non possunt ad oculum, sentis saltem ab experto fiduciam, dum negotia nostra tibi secure committimus, et tamquam alteri parti nostri corporis, fiducialiter inheremus? 4. Omnes igitur, si quae tibi rancoris preterea forte remanserunt, expelle reliquias et, dubietatis cuiuslibet abstersa caligine uel rubigine, de immutabilis mentis nostrae stabilitate confidas, ut, sicut erga nos tuae fidei mutare constantiam te non posse confidimus, sic erga te gratiae nostrae fauorem posse non dubites uariari.

notes alpha

    notes int