Fidelitati tue sub pena unciarum
quinquaginta auri firmiter et expresse precipimus, quatenus statim receptis presentibus
mittas de singulis terris iurisdictionis tue vicinis aput
Lacumpensilem die quolibet sine
defectu et intermissione quolibet, donec nos ibi cum gente nostra feliciter esse contingerit,
ad vendendum pro familia et gente nostra curiam nostram sequentibus fodrum panis, vini, carnium,
ovorum, gallinarum, ordei et aliarum rerum necessariarum usui hominum in quantitate necessaria,
ut semper et continue huiusmodi rerum venalium accessoriarum usui hominum et equorum necessaria,
et sufficiens quantitas inveniatur venialis. Iniuncturus baiulis iudicibus magistris iuratis et
universitatibus terrarum et locorum ipsorum, singulis videlicet eorum sub pena decem unciarum auri,
quod totam quantitatem fodri panis videlicet, vini, carnium, ovorum, gallinarum, ordei et aliarum
rerum, quam de qualibet terrarum ipsarum mittendam provideris et iniunxeris, consideratis facultatibus
et qualitate ac distantia locorum ipsorum, die quolibet mittere studeas aput
Lacumpensilem ad vendendum.
Ita quod de representatione ipsius fodri vice qualibet recipiant et habeant cedulas a vice marescallo
regni Sicilie vel statuto
loco sui, et si de representatione ipsius fodri non receperint et habuerint
vice qualibet a predicto vice marescallo cedulam, ut est dictum, penam predictam a singulis hiis qui
in missione ipsius fodri defecerint instanter exigas, et ad cameram nostram castri Salvatoris ad mare
de Neapoli studeas destinare,
et quid et quantum pro pena huiusmodi exigeris, a quibus et quando, et
ad predictam cameram nostram miseris, magistris rationalibus magne curie nostre distinte per litteras
tuas significes. Nichilominus sic instes, procures et facies, quod huiusmodi fodrum continue et sine
defectu quolibet transmittatur, cum tibi exinde incumbamus, quia si in mittendo et habendo fodro ipso
defectus emerserit, penam predictam a te mandabimus extorqueri, quantitatem et qualitatem vero fodri,
quam de qualibet terrarum et locorum ipsorum mitti statueris et mandaveris, redigi facias in tribus
quaternis similibus, quorum uno tibi retento, alium magistris rationalibus magne curie nostre et
consimilem dicto vice marescallo sigillatum sigillo tuo transmittas, et quia nolumus eos occasione
predicte pene intercipi, quia forte grave foret predictis universitatibus ac videretur impossibile
posse die quolibet fodrum ipsum, provideas et statuas cuilibet ipsarum certum numerum dierum qualibet
edomada, quibus diebus in mittendo fodro ipso defectum aliquem non committant, ita committant bis in
edomada fodrum ipsum nec deficiant in committendo illis diebus, quos eis duxeris bis in qualibet edomada
statuendos.
