Ex concessione dare memorie
domini patris nostri, dudum Otho de Tuciano miles consanguineus noster, inter
cetera munificientia sibi principali concessa, casale asprum situm in
iurisdictione tua cum iuribus tenimentis et pertinentiis suis pacifice
tenuit et possedit, subsequenter post obitum Othonis predicti, casale
ipso cum eisdem iuribus et pertinentiis nobili mulieri Philippe, comitisse
Albe
eiusdem Othonis coniugi, ratione dodarii per eumdem Othonem sibi constituti
legitime per quondam Philippum de Tuciaco
communem genitam de licentia et assensu
nostro rationabiliter assignato, de hiis non est opus inquirere cum plene nostra
curia sit instructa, dum autem comitissa iamdicta casale ipsum cum iuribus et
pertinentiis suis ex predicta causa teneret, sicut facta nobis expositio continet,
olim Iohannes de Monteforti
regni Sicilie camerarius, cui custodia palatii defense
seu foreste Lacuspensilis per nos specialiter commissa fuerit, eamdem comitissam
non vocatam aut monitam vel ex more citatam certa parte tenimenti casalis eiusdem absque
ordine iuris destituit, et partem dicte defense seu foreste
Lacuspensilis, sicut sibi
placuit, agregavit, nec attento per ipsum comitem inter cetera in destitutione ipsa
improvise, pensata, quod tenimentum casalis ipsius ex vigore inquisitionis per officiales
regie curie dudum facte divisum et distinctum fuerat ac per lapideos terminos, sicut
vulgariter habet regionis locutio, titulatum terminis seu titulis ipsis ad hoc affisis
astantibus, divisionem et terminationem ipsam cum confusionis involucro et destitutionis
iniuria ex abrupto dirrupit, cumque casale predictum cum iuribus et pertinentiis suis
ad Iohannem Pipinum
de Barolo
militem, magne curie nostre magistrum rationalem, domesticum
familiarem nostrum de novo pervenerit, ex causa permutationis legitima cum dicta comitissa
de nostro assensu et licentia celebrate, supplicavit nobis predictus
Iohannes ut providere
circa hoc sibi tam benigne quam iuste nostre auctoritatis presidium dignaretur. Nos igitur
violentas destitutiones huiusmodi, que paraverunt in regno nostro
Sicilie turbulenta discrimina,
vehementius aborrentes, licet ipse non iuris set rei sit in hac parte successor, fidelitati tue
de certa nostra scientia committimus et mandamus, quatenus procuratore et advocato fisci nostri
per te constitutis legitime, qui circa hoc iura nostre curie tueantur, de premissis diligenter
inquiras, et si rem inveneris ita esse, dictam partem tenimenti memorati casalis, per eumdem
Iohannem de Monteforti defense seu foreste
Lacuspensilis agregatam, territorio et tenimento
dicti casalis reintegres, ac ipsi
Iohanni Pipino pro se et suis heredibus restituas et resignes,
servatis et servari faciens divisionem et terminationem iam dictas per officiales regie curie de
tenimento iamdicti casalis habitam et distinctam, et ad cautelam fieri facias de inquisitione
reintegratione restitutione et resignatione predictis tria puplica consimilia instrumenta.
Quorum unum tibi retineas tempore tui rationarii producendum, aliud procuratori
dicti Iohannis
assignes et tertium mittes ad cameram in archivio nostre curie conservandum.
