Nos Robertus de Guidono dicte terre Campane Annalis Iudex, Simeon Magnatus publicus eiusdem Terre Regia authoritate Notarius et subscripti testes de eadem terra, videlicet Magister Franciscus de Cinamo, notarius Tomasius de Cava, Iudex Simeon de Daniele, Iudex Robertus Campanus, Notarius Bartholomeus de Iannino, Gulielmus Bistandus, notarius Gualterius de Iudice Andrea de Civitate Penne, et Notarius Iacobbus de Cava viri litterati ad hoc specialiter notati, et rogati, presenti scripto publico declaramus, notum facimus, et testamur quod constitutus in nostra praesentia nobilis, et egregius Vir Dominus Gulielmus Ruffus de Sinopulo Miles Ducalis Cambellanus, et familiaris, ac Regius Iustitiarius Principatus Citra, Terras Montorii, ostendit, presentavit, et exhibuit coram nobis, et publice legi fecit quasdam Patetens Ducales Literas pendenti Vicarie Sigillo magno quo utitur Cere rubee sigillatas, non cancellatas, non abolitas, non abrasas nec aliqua sui parte suspectas, aut vitiosas, omnique prorsus vitio, et suspectione carentes, quas vidimus, legimus, et diligenter inspeximus, erantque per omnium continentie subnotate.
Et quia dictus Dominus Gulielmus Iustitiarius sua interesse dicebat habere predictas Ducales Literas autenticas, et in publica formam redactas, consensiens pariter in nos predictos Iudicem, Notarium et testes, ut in suos, cum sciret ex certa eius scientia nos suos Iudices, Notarium et testes in hac partem non esse, Iudiciali authoritate nos requisivit et rogavit attentim, ut ipsas Literas Ducales exemplatas transcribi autentica, et in publicam formam redigere deberemus nostrumque super hoc Officium implorando. Cuius petitionibus annuentes, et tamquam consentanee rationi predictas Ducales Literas ad requisitionem, et instantiam dicti Domini Gulielmi Ruffi exemplamus, transferimus, autenticamus, et in publica forma redigimus de verbo ad verbum, ut ipse originales Litere continentur. Nihil in eis vel exinde mutato, addito, seu subtracto, sed facta diligenti collatione in nostra presentia de dictis Ducalibus Literis ad ipsarum tenorem in presenti publico Instrumento quo scripto ipsi tenor, et Litere in omnibus, et per omnia sunt concordantes.
