omnipotentis et gloriose Virginis Marie et omnium Sanctorum amore, etiam pro animarum magnifici Rogerii primi comitis Sicilie necnon gloriosi regis Rogerii bone memorie salute, meique genitoris ceterarumque parentum salute, spontanea mea voluntate, precibus etiam crebris intervenientibus domni Iohannis Marsici Sancte Trinitatis de Cava monachi, dono et concedo tibi domne Marine venerabilis abbas Sancte Trinitatis de Cava et tuis successoribus, glandes per totam nostram pertinentiam Marsici pro demaniis suis ecclesie Sancti Petri Tramutule et hominum casalis Tramutule propriorum similiter suibus. Ea videlicet ratione et pacto ut ab isto die in antea secure et sine glandiatico aliquo iamdicti sues tam prefate ecclesie quam proprium hominum eiusdem ecclesie omni tempore pascant, et homines iamdicti casalis Sancti Petri Tramutule de glandibus colligant sicut alii homines Marsici. Que donatio facta est in camera mea Ragusie rogatu et requisitione domni Iohannis Marsicani tui monachi et cappellani, existentibus ibidem idoneis viris, quorum nomina subterleguntur. Quam cartam per manus Lamberti mei notarii scribi precepi et meo sigillo plumbeo confirmari. Si quis vero hanc donationem infringere vel diminuere sive retraere voluerit, sciat se regales componere quinquaginta, medietatem regali curie et medietatem Sancte Trinitatis de Cava, penaque persoluta presens privilegium pristinum robur obtineat.
